இலங்கை, ரஷ்யா, துபாய், மாலத்தீவு உள்ளிட்ட நாடுகளுக்கு முட்டை ஏற்றுமதி செய்ய நடவடிக்கை எடுக்கப்படும், என, தேசிய முட்டை ஒருங்கிணைப்புக்குழு நாமக்கல் மண்டல புதிய தலைவர் சிங்கராஜ் தெரிவித்தார்.

தேசிய முட்டை ஒருங்கிணைப்பு குழு (NECC) :

நாமக்கல் மண்டலத்தில் சுமார் 1,100 கோழிப்பண்ணையாளர்கள் உள்ளது. இங்கு 6 கோடி முட்டையின கோழிகள் வளர்க்கப்பட்டு தினசரி 5 கோடி முட்டைகள் உற்பத்தி செய்யப்படுகிறது. இங்கு உற்பத்தி செய்யப்படும் முட்டைகள் சில்லறை விற்பனைக்காக தமிழ்நாடு, கேரளா, பாண்டிச்சேரி உட்பட பல்வேறு மாநிலங்களுக்கும் வெளி நாடுகளுக்கும் ஏற்றுமதி செய்யப்படுகின்றது. இந்த முட்டைக்கான விலையை தேசிய முட்டை ஒருங்கிணைப்பு குழு தினசரி நிர்ணயம் செய்து வருகிறது.

தேசிய முட்டை ஒருங்கிணைப்பு குழுவின் தேர்தல்:

இந்நிலையில், நாமக்கல் மண்டல தேசிய முட்டை ஒருங்கிணைப்பு குழுவின், தற்போதைய நிர்வாகிகளின் பதவிக்காலம் நிறைவு பெறுவதால், புதிய நிர்வாகிகள் தேர்தல் அறிவிக்கப்பட்டது.

அதன்படி தேசிய முட்டை ஒருங்கிணைப்பு குழு நாமக்கல் மண்டலம் மற்றும் அதற்குட்பட்ட புதன்சந்தை, பரமத்தி, ராசிபுரம், மோகனுார், நாமக்கல், பல்லடம் மற்றும் ஈரோடு உள்ளிட்ட ஏழு வட்டார குழுக்களுக்கான நிர்வாகிகள் தேர்தல், கடந்த 22.12.2023 அன்று வரை நடந்தது.