திருச்செங்கோட்டை அடுத்த கோக்கலை கிராமத்தில் அனுமதிக்கப் பட்ட அளவுக்கு மேல் கனிமங்களை வெட்டி எடுத்து சட்டத்துக்கு விரோதமாக செயல்படும் குவாரிகளை வருவாய்த் துறையினர், பொது மக்களுக்கு பாதிப்பில்லாத வகையில் அளவீடு செய்து தர வலியுறுத்தி 50 பெண்கள் உட்பட 200-க்கும் மேற்பட்ட கிராம மக்கள் உண்ணாவிரதத்தில் ஈடுபட்டனர்.

நாமக்கல் மாவட்டம் திருச்செங்கோடு தாலுக்கா எலச்சிபாளையம் ஒன்றியம் கோக்கலை ஊராட்சி எளையாம் பாளையம் பகுதியில் ஐந்துக்கும் மேற்பட்ட கல்குவாரிகள் இயங்கி வருகின்றன. குறிப்பிட்ட காலக்கெடு முடிந்த பிறகு செயல்படாமல் இருந்து வந்த இந்த கல்குவாரிகள் மீண்டும் செயல்பட அரசு அனுமதி வழங்கியுள்ளது. ஏற்கனவே இந்த கல்குவாரிகளால் தங்களுக்கு பாதிப்பு இருப்பதாக கிராம மக்கள் கூறி வந்த நிலையில் அனுமதிக்கப்பட்ட, சட்டத்திற்கு உட்பட்ட அளவுக்கு குவாரிகளில் கனிமங்கள் வெட்டி எடுக்கப்பட்டுள்ளதா சட்ட விதிகளுக்கு உட்பட்டு குடியிருப்புகள் மற்றும் நத்தம் புறம்போக்கு நிலங்கள் இருக்கின்ற இடங்களில் குவாரிகள் செயல்பாட்டால் பாதிப்பு ஏற்பட்டுள்ளதா என்பது குறித்து வருவாய்த் துறையினர் உரிய அளவீடு செய்து அனுமதி வழங்க வேண்டும் என கிராம மக்கள் பல்வேறு வகையான போராட்டங்களை நடத்தி வருகின்றனர்.