இதுகுறித்து நகர்மன்றத் தலைவர் நளினி சுரேஷ் பாபு செய்தியாளர்களிடம் கூறுகையில், திருச்செங்கோடு நகரப் பகுதிகளில் நாய்களின் தொல்லை அதிகமாக உள்ளது. நாய்களைப் பிடித்து கர்ப்ப தடை செய்து, அந்தந்த பகுதிகளிலேயே விட்டாலும், அவைகள் வெறிபிடித்து பொதுமக்களை கடித்துக் குதறிக் கொண்டிருக்கிறது. நாய்களை கொல்லக்கூடாது, சித்திரவதை செய்யக்கூடாது என ப்ளூ கிராஸ் உள்ளிட்ட பல்வேறு அமைப்புகள் தெரிவிக்கின்றன. ஆனால், தற்போது நாய் உயிர் முக்கியமா? மனித உயிர் முக்கியமா? என முடிவெடுக்க எடுக்க முடியாத நிலையில்  தடுமாற்றத்தில் இருக்கிறோம். பொதுமக்களின் புகாரின் படி நாய்களைப் பிடித்து கருத்தடை செய்து அந்தந்த வார்டு பகுதிகளில் விட்டு வருகிறோம். என்ற போதிலும் இதற்கு நிரந்தரமான தீர்வினை தமிழக அரசு ஏற்படுத்தித் தர வேண்டும். வழிகாட்டுதல் நெறிமுறைகளை உருவாக்கி தர வேண்டும் என தெரிவித்தார்.

திருச்செங்கோடு மட்டும் மட்டுமின்றி நாமக்கல் மாவட்டத்தில் உள்ள அனைத்து நகர்பகுதிகள் மற்றும் கிராம பகுதிகளில் நாய்கள் தொல்லை அதிகளவில் காணப்படுகிறது. கூட்டமாக சுற்றி திரியும் நாய்களால் சாலையில் வாகனங்களில் செல்பவர்களும் நடந்து செல்பவர்களும் கடும் அவதி அடைந்துள்ளனர். கிராமப்புறங்களில் விவசாயிகள் தங்களது விவசாய நிலத்தில் வளர்க்கும் கால்நடைகளை வெறி நாய்கள் கடித்து குதறுவது வாடிக்கையாக உள்ளது. இதனால் கால்நடைகள் வளர்ப்போருக்கு பெருத்த நஷ்டம் ஏற்படுகிறது. தெருக்களில் சுற்றி திரியும் நாய்களை கொல்ல கூடாது என சட்டம் இருந்தாலும் மனிதர்களின் உயிரை விட விலைமதிக்க முடியாதது வேறு ஏதேனும் உள்ளதா என்கிற கேள்வியை முன்வைக்கின்றனர் நாமக்கல் வாழ் மக்கள்..