தொழிலாளர்களைத் தேடி மருத்துவம் திட்டம் நாமக்கல் மாவட்டம் முழுவதும் விரிவுப்படுத்தப்படும் என மாவட்ட ஆட்சியர் உமா தெரிவித்துள்ளார்.

நாமக்கல் மாவட்டம், மோகனூர், சேலம் கூட்டுறவு சர்க்கரை ஆலையில் இன்று  (09.01.2024) தொழிலாளர்களை தேடி மருத்துவம் திட்டத்தின் கீழ், தொற்றாநோய்களுக்கான பணியிடம் சார்ந்த பரிசோதனை முகாம் நடைபெற்று வருவதை மாவட்ட ஆட்சியர் உமா பார்வையிட்டார்.

”தொழிலாளர்களை தேடி மருத்துவம்”  திட்டத்தின் கீழ், மோகனூர், சேலம் கூட்டுறவு சர்க்கரை ஆலையில் பணிபுரியும் 300 பணியாளர்களுக்கு தொற்றா நோய்களுக்கான மருத்துவ பரிசோதனைகள் மேற்கொள்ளப்பட்டுள்ளது.

இம்முகாமில் மாவட்ட ஆட்சித்தலைவர் மருத்துவர் உமா, பேசுகையில், தமிழ்நாடு முதலமைச்சர் பொதுமக்களின் ஆரோக்கித்தை கருத்தில் கொண்டு மக்களைத்தேடி மருத்துவம், வருமுன் காப்போம் திட்டம், இன்னுயிர் காப்போம் – நம்மை காக்கும் 48 உள்ளிட்ட பல்வேறு திட்டங்களை செயல்படுத்தி வருகின்றார். அதனடிப்படையில், தமிழ்நாடு முழுவதும் உள்ள 32 லட்சம் தொழிலாளர்களின் நலனை பாதுகாத்திடும் வகையில், தொழிலாளர்களை தேடி மருத்துவம் திட்டத்தினை செயல்படுத்த தமிழ்நாடு முதலமைச்சர் உத்தரவிட்டுள்ளார்.

அதன்படி, மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன், துணிநூல் மற்றும் கைத்தறி துறை அமைச்சர் ஆர்.காந்தி அவர்கள் ஆகியோர் இன்று (09.01.2024) திருவள்ளுர் மாவட்டத்தில் தொடங்கி வைத்து, வழிகாட்டி கையேட்டினை வெளியிட்டனர்.

”தொழிலாளர்களை தேடி மருத்துவம் திட்டத்தின் கீழ் ஏராளமானோர் பயன்”

மக்களைத் தேடி மருத்துவம் திட்டம், தொழிற்சாலைகளில் பணிபுரியும் தொழிலாளர்களும் பயனடையும் வகையில் ”தொழிலாளர்களை தேடி மருத்துவம்” திட்டம் விரிவுப்படுத்தப்பட்டு, தொடங்கி வைக்கப்பட்டுள்ளது. ”நாமக்கல் மாவட்டத்தில் மக்களைத்தேடி மருத்துவம் திட்டத்தின் மூலம் 13,66,452 நபர்களுக்கு மருத்துவ பரிசோதனைகள் செய்யப்பட்டு, 3,09,299 நபர்கள் தொடர் சிகிச்சையின் மூலம் பயனடைந்து வருகின்றனர்.

இந்தியாவில் தொழில் வளர்ச்சியில் தமிழ்நாடு முன்னிலை மாநிலமாக திகழ்ந்து வருகிறது. மாநிலத்தின் பொருளாதார வளர்ச்சிக்கு அடித்தளமாக விளங்கும் தொழிலாளர்களின் நலனில் தனி அக்கறை கொண்டு தொழிற்சாலைகளிலும், கட்டுமானம் உள்ளிட்ட அமைப்புசாரா தொழில்களிலும் ஈடுபட்டுள்ள தொழிலாளர்கள் தொற்றாநோய்களுக்கான பணியிடம் சார்ந்த பரிசோதனை திட்டம் தொடங்கப்பட்டுள்ளது.

முதற்கட்டமாக ரூ.43.89 இலட்சம் மதிப்பீட்டில் 38 மாவட்டங்களில் உள்ள 711 தொழிற்சாலைகளில் பணிபுரியும் 8,53,000 பணியாளர்களுக்கு மக்களை தேடி மருத்துவம் திட்டம் விரிவுப்படுத்தப்படவுள்ளது.