நாமக்கல் அருகே டாஸ்மாக் கடைக்கு தமிழுடன் இந்தியில் பெயர் பலகை வைத்ததால் சர்ச்சை எழுந்தது.‌ இதனையடுத்து அந்த பெயர் பலகை மாற்றப்பட்டது.

நாமக்கல் மாவட்டம் முழுவதும் 188 அரசு டாஸ்மாக் கடைகள் இயங்கி வருகின்றன. இங்கு நாள்தோறும் பல லட்சம் ரூபாய்க்கு மது விற்பனை நடைபெற்று வருகிறது.

இந்நிலையில், நாமக்கல் அடுத்த முதலைப்பட்டி சேலம் – நாமக்கல் தேசிய நெடுஞ்சாலை பகுதியில் டாஸ்மாக் கடை ஒன்று செயல்பட்டு வருகிறது. இங்கு வாகன ஓட்டிகளும், மதுபிரியர்கள் அறிந்து கொள்ளும் வகையில் நேற்று  பெயர் பலகை ஒன்று அமைக்கப்பட்டது.

இந்த பெயர் பலகையில் ஆங்கிலம், தமிழ் மொழிகளோடு ஹிந்தி மொழியிலும் பெயர் பலகை வைக்கப்பட்டது. தமிழக அரசு தனியார் நிறுவனங்கள் தங்களது கடைகளில் பெயர் பலகையை தமிழில் மட்டுமே இடம் பெற வேண்டும் என உத்தரவிட்டுள்ள நிலையில் அரசு முத்திரையுடன் வைக்கப்பட்டுள்ள இந்தப் பெயர் பலகையில் 3 மொழிகள் இடம் பெற்றிருந்தது. இது சர்ச்சையை ஏற்படுத்திய நிலையில், தற்போது இந்த பலகை மாற்றப்பட்டது.

இதையும் படிங்க ; சேந்தமங்கலம் அருகே நடந்த சாலை விபத்தில் பள்ளி மாணவர்கள் உட்பட 3 பேர் உயிரிழப்பு